Innlent | Morgunblaðið | 10.6.2023 | 10:08

Ósáttir við útkallstíma viðbragðs

Þór Sigurgeirsson, bæjarstjóri á Seltjarnarnesi. mbl.is/Sigurður Bogi

Seltirningar eru ósáttir við útkallstíma viðbragðsaðila þegar á það er litið að lengri tíma tekur að bregðast við vá í bænum en þær tíu mínútur sem miðað er við í brunavarnaráætlun Slökkviliðs höfuðborgarsvæðisins. Þeir gera kröfu um að aðstöðu fyrir slökkvi- og sjúkralið verði komið upp nær Seltjarnarnesi, í vesturhluta borgarinnar, til að mynda á háskólasvæðinu eða á Granda, til að auka öryggi íbúa á svæðinu.

Þá sé ljóst að ástandið versni að mun þegar framkvæmdir við nýtt byggingasvæði í Skerjafirði hefjast og þangað flytjast þeir 3.600 nýju íbúar sem gert er ráð fyrir að taki sér bólfestu í nýrri byggð í Skerjafirði.

Þór telur að ljósastýrð gatnamót Hringbrautar og Ánanausta verði flöskuháls. Sigtryggur Sigtryggsson

„Við erum alls ekki sátt við viðbragðið. Ekki bætir úr skák að borgarskipulagið og Vegagerðin töldu ljósastýrð T-gatnamót í stað hringtorgsins við JL-húsið bestu lausnina fyrir umferðarflæði þar. Sú hugmynd er vonandi komin í tætarann. Það myndi tefja viðbragðsaðila enn frekar og skapa enn meiri tafir fyrir okkur úti á Nesi, hvað þá fyrir 25 þúsund Vesturbæinga á leið í og úr vinnu,“ sagði Þór Sigurgeirsson bæjarstjóri Seltjarnarness í samtali við Morgunblaðið.

Nánar er rætt við Þór í Morgunblaðinu í dag